N'Asturies la gaita siempre ta

El documental N'Asturies la gaita siempre ta fai un percorríu completu pola cultura asturiana de la gaita, tratando la so dimensión histórica, social, pedagóxica y artesanal, amás de la so proyeición contemporánea y el procesu de reconocencia institucional. El relatu empieza con una mirada a los oríxenes de les escueles de música tradicional, nes que la gaita recuperó protagonismu dempués de décades de tresmisión oral y familiar. Figures clave como Xuacu Amieva, José Ángel Hevia o Santi Caleya esplican el pasu d'un deprendimientu heredáu a un modelu estructuráu d'enseñanza que garantiza la continuidá del instrumentu. De siguío, col testimoniu de músicos reconocíos como Flavio Benito o David Varela, el programa céntrase nel presente y futuru de la formación musical, mostrando cómo les escueles anguaño conviven con metodoloxíes nueves, llinies d'investigación pedagóxica y una incorporación de la gaita a otros llinguaxes musicales, ensin perder el so raigañu tradicional.