Rostros do país: Sérgio Tannus

Sérgio Tannus é ante todo alegría, vitalidade, ponte. Chegou a Galicia despois de coincidir no seu país, Brasil, cos músicos galegos Uxía, Pepe Sendón e NARF. Hoxe en día, canta, compón, toca e colabora con boa parte dos artistas galegos que constrúen ponte coa lusofonía. Defínese a si mesmo como un brasilego total. A súa alma brasileira éncheo todo, pero sempre en continua aprendizaxe e fusión cos ritmos, acentos e maneiras de ser que hai en Galicia. O equipo de Nós Televisión conversa con el sobre toda a súa traxectoria musical e a súa filosofía de vida, sentado na parte de abaixo da Casa das Crechas, en Santiago de Compostela, un lugar máxico, testemuña directa ao longo dos anos de boa parte dos pasos que foi dando.